पर्वत, २५ भदौ । सदरमुकाम कुस्मा बजारबाट नयाँ साप्ताहिक पत्रिका ‘खबर डबली’ले शुक्रबारदेखि प्रकाशन सुरु गरेको छ ।
पिएन्डपी मिडिया प्रालिद्वारा हरेक साताको शुक्रबार प्रकाशन हुने गरी प्रकाशन सुरु भएको हो । निष्पक्ष विचार र सत्यतथ्य खबर भन्ने नारासहित प्रकाशित साप्ताहिकका सम्पादकमा गीताकुमारी शर्मा रहेका छन् ।
सञ्चारमाध्यम खुल्ने क्रम बढिरहेका बेला पाठकलाई नयाँपन दिने उद्देश्यले पत्रिका सञ्चालनमा ल्याइएको पत्रिकाका सल्लाहकार तथा प्रेस चौतारी नेपालका पूर्व वरिष्ठ उपाध्यक्ष दुर्गाप्रसाद शर्माले जानकारी दिए ।
यसअघि यहाँ तीन दैनिक र नौ साप्ताहिक पत्रिका निरन्तर प्रकाशन भइरहेका छन् । त्यसैगरी चार चार त्रैमासिक पत्रिका र एफएम रेडियो तथा एक केबुल टेलिभिजन समेत नियमित प्रसारणमा छन् । यसै साता गत सोमबारदेखि ‘बुलेट न्युज’ साप्ताहिकले पनि प्रकाशन सुरु गरेको थियो । रासस
