काठमाडौं । सोलुदुधकुण्ड नगरपालिका दोर्पुबजारका मञ्जिल श्रेष्ठ गोथिया कप फुटबल खेल्न नेपाली टोलीमा छनौट भएका छन् । १६ वर्ष उमेर समूहमा श्रेष्ठले उत्कृष्ठ खेल प्रदर्शन गरेकाले उनी गोथिया कप फुटबल खेल्न छनौट भएका हुन् ।
आइतबारदेखि चीनमा शुरु हुने गोथिया कप फुटबलमा भाग लिन नेपाली टोली शनिबार चीन प्रस्थान गरेको छ । नेपाली टोलीले १६ वर्ष उमेर समूहमा प्रतिस्पर्धा गर्नेछ ।
नेपालवाट प्रतियोगितामा सहभागी हुने एक मात्र टिम जुनियर फुटबल एकेडेमीका खेलाडी तथा प्रशिक्षकलाई शनिबार बिदाई गरिएको हो । १० टिम सहभागी हुने सो समूहमा नेपाल सहित कोरिया, चीन, अष्ट्रेलीया, इन्डोनेसिया, बंगलदेश र फिलिपिन्सका टिमले भाग लिनेछन् ।
नेपालको जुनियर फुटबल एकेडेमी रहेको समूहमा कोरिया, चीन, अष्ट्रेलीया र इन्डोनेसियाको टिमबीच प्रतिस्पर्धा हुनेछ । नेपाली टिमले आफ्नो पहिलो खेल सोमबार इन्डोनेसियासँग खेल्नेछ । दोश्रो खेलमा नेपालले मंगलबार कोरियाको सामना गर्नेछ भने तेश्रो खेलमा बिहिबार अष्ट्रेलियाली टिमको सामना गर्नेछ । चौथो खेलमा नेपालको जुनियर फुटबल एकेडेमीको भेट चीनको टिमसँग हुने प्रशिक्षक प्रज्वल क्षेत्रीले जानकारी दिए ।
