रामपुर (पाल्पा), १० मङ्सिर । विद्यालयमा सेनेटरी प्याडको व्यवस्था हुन थालेपछि बीचैमा कक्षा छाड्ने छात्राको सङ्ख्यामा कमी आएको छ ।
महिनावारी भएका बखत विद्यालय जान छाडेर घरमै बस्ने गरेकोमा सेनेटरी प्याडको व्यवस्थापन विद्यालयमै हुन थालेपछि पछिल्लो समयमा कक्षा छाड्ने छात्राको सङ्ख्यामा कमी आएको हो ।
उनीहरु कक्षामा बसेर पढिरहेका बेला महिनावारी वा रजस्वला भएपछि बीचैमा कक्षा छाडेर घर फर्कने गर्दथें । तर कक्षा छाड्ने छात्राको सङ्ख्यामा कमी ल्याउने उद्देश्यले विद्यालयले सेनेटरी प्याडको व्यवस्था गर्न थालेपछि कक्षा छाड्नेको सङ्ख्यामा कमी आउन थालेका छन् ।
रामपुर र गाडाँकोट स्रोतकेन्द्रअन्तर्गतका मावि र निमावि तहका झन्डै ६० विद्यालयमा सेनेटरी प्याडको व्यवस्था रहेको गाउँ बाल संरक्षण समिति रामपुरका संयोजक लेखनाथ शर्मा मरासिनीले बताउनुभयो ।
सेनेटरी प्याड वितरणका लागि प्रत्येक विद्यालयले महिला शिक्षकको समेत व्यवस्था गरेको छ । कक्षामा पढिरहेका बेला महिनावारी हुँदा छात्राहरु आफूसँग सम्पर्क गरेर सेनेटरी प्याड प्रयोग गर्ने गरेको रामतुल्सी उच्च माविका शिक्षिका विनिता श्रेष्ठले बताउनुभयो ।
“पहिला पहिला कक्षामा पढिरहँदा महिनावारी भएपछि बीचैमा कक्षा छाडेर घर जाने र दुई तीन दिनसम्म विद्यालयमा अनुपस्थित हुने गर्दथे”, उहाँले भन्नुभयो –“सुरु सुरुमा त सेनेटरी प्याड माग्न असजिलो मानेका छात्राले हिजोआज नलजाइकन माग्ने गरेका छन् ।”
गाउँदेखि सहरसम्मका सबै विद्यालयमा सेनेटरी प्याडको व्यवस्था भए छात्राको बीचैमा कक्षा छाड्ने क्रममा उल्लेखनीय कमी हुने दाबी शिक्षिकाहरुका छन् ।
