कालिन्चोकबाट फर्किएका बस दुर्घटना, ४ जनाको मृत्यु,एकीन विवरण आउन बाँकी

काठमाडौं । दोलखाको कालिन्चोकबाट भक्तपुर आउँदै गरेको बस सिन्धुपाल्चोकमा दुर्घटना हुँदा ४ जनाको मृत्यु भएको छ ।

सिन्धुपाल्चोकको सुनकोसी गाउँपालिका–७ , स्थित ६ किलोमा भन्ने स्थानमा बा ४ ख ४४६८ नम्बरको बस दुर्घटना भएको हो ।

सिन्धुपाल्चोकमा कार्यरत नेपाल प्रहरीका इन्स्पेक्सटर गणेश खनालले दुर्घटनाको पुष्टि गर्दै ४ जनाको ज्यान गइसकेको र कैयन हताहत रहेको बताए ।

‘दुर्घटनामा अहिलेसम्म ४ जनाको मृत्यु भइसकेको जानकारी प्राप्त भएको छ’, खनालले भने, ‘कैयन यात्रु हताहत भएकाले क्षतिको यकिन विवरण संकलन भइसकेको छैन ।’

खनालका अनुसार कालिन्चोक मन्दिर दर्शनका लागि रिजर्भ गरेर लगिएको उक्त बस आइतबार बिहान ८ः१५ बजे दुर्घटना भएको हो । सडकबाट अन्दाजी ५०० मिटर तल खसेको बसमा कति यात्रु सवार थिए भन्ने यकिन नभएको जिल्ला प्रहरी कार्यालय, सिन्धुपाल्चोकले जनाएको छ ।

प्रहरी र स्थानीय अहिले घाइते यात्रुको उद्धारमा जुटेका छन् ।

सिन्धुपाल्चोकमा एक महिनाको बीचमा भएको यो अर्को दुर्घटना हो । गत कात्तिकमा सुकुटेमा बस दुर्घटना हुँदा १७ जनाको ज्यान गएको थियो । त्यसअघि असोज २४ मा पनि बा २ ख २७१५ नम्बरको बस इन्द्रवाती गाउँपालिका १०, बडहरे झिल्के मोडमा दुर्घटना भएको थियो । जसमा दर्जन बढीको ज्यान गएको थियो ।

तपाईको प्रतिक्रिया

सम्बन्धित समाचार