कोरोना सचेतना : वाग्मती प्रदेशका सबै जिल्लामा आइसोलेशन वार्ड

Facebook Debugger


काठमाडौं । वाग्मती प्रदेश स्वास्थ्य निर्देशनालयले कोरोना भाइरस (कोभिड-१९)बाट संक्रमितहरुलाई उपचार गर्न सबै जिल्लामा आइसोलेशन वार्ड स्थापना गरेको छ । कोरोना भाइरसबाट संक्रमित भई आकास्मिक रूपमा आएका बिरामीलाई तत्काल उपचारमा ल्याउन उपत्यकाबाहेक प्रदेशका १० जिल्लाको अस्पतालमा आइसोलेशन वार्ड पूर्ण तयारीका साथ राखिएको हो ।
आइसोलेशन वार्ड राखिएको जिल्ला अस्पतालमा छुट्टाछुट्टै वार्डमा दक्ष चिकित्सक, स्वास्थ्यकर्मी, मास्क, प्रविधियुक्त पोशाक र उपकरणसहित तयारी अवस्थामा राखिएको प्रदेश स्वास्थ्य निर्देशनालयका निर्देशक डा. अर्जुन सापकोटाले बताए । उनका अनुसार, ती अस्पतालको आइसोलेशन वार्डमा आवश्यक पर्ने प्रविधियुक्त पोशाक, मास्क एवं विभिन्न उपकरण खरिद गरी सम्बन्धित अस्पतालमा पठाउने कार्य भइरहेको जानकारी दिए ।
वाग्मती प्रदेशका मुख्यमन्त्री डोरमणि पौडेलको निर्देशनबमोजिम जिल्ला स्वास्थ्य कार्यालयको संयोजनमा सम्बन्धित गाउँपालिका, थाहा नगरपालिका र नगरपालिकाको स्वास्थ्य चौकी, उपचौकी र प्राथमिक उपचार केन्द्रका स्वास्थ्यकर्मीले सम्बन्धित गाउँटोलका स्थानीय जनताको घरदैलोमा पुगी कोरोना भाइरस रोगको प्रभावबाट बच्ने विषयमा प्रदेशका १० वटै जिल्लामा अहिले जनचेतनामूलक अभियान सञ्चालन भइरहेको प्रदेश स्वास्थ्य निर्देशनालयका प्रमुख निर्देशक रमेश अधिकारीले बताए ।
काठमाडौँ उपत्यकाको वीर अस्पताल, त्रिवि शिक्षण अस्पताल, टेकु सरुवा रोग अस्पताल, ललितपुर र भक्तपुर जिल्ला अस्पतालमा आइसोलेशनका लागि छुट्टाछुट्टै रुपमा आइसोलेशन वार्ड स्थापना भइरहेको स्वास्थ्य निर्देशनालयका प्रमुख अधिकारीले बताए ।
प्रदेश राजधानी हेटौँडामा कोरोना भाइरसबाट बच्ने उपायबाट सजक रहे पनि बजारमा मास्कको अभाव भएकाले पर्याप्त उपलब्ध गराउन वाग्मती प्रदेशका सामाजिक विकास मन्त्रालयलाई अनुरोध गरिससकेको मकवानपुरका प्रजिअ नारायणप्रसाद भट्टले बताए । वाग्मती प्रदेशमा काठमाडौँ, ललितपुर र भक्तपुरसहित १३ जिल्ला समेटिएका छन् ।

loading...

तपाईको प्रतिक्रिया

सम्बन्धित समाचार