वीरगञ्जमा मृत्यु भएकी किशोरीमा कोरोना संक्रमण पुष्टि, नेपालमा कोरोनाबाट मृत्यु हुनेको संख्या ४५ पुग्यो !

Facebook Debugger

काठमाडौं । वीरगञ्जको नारायणी कोरोना विषेश अस्पतालमा उपचारत १ जना कोरोना सङ्क्रमितको मृत्यु भएको छ ।

अस्पतालका डाक्टर निरज सिंहका अनुसार बाराकी १७ वर्षीया किशोरीको मृत्यु भएको हो । ती किशोरीको कोरोना परीक्षणको रिपोर्ट पोजेटिभ आएको उनले जानकारी दिए ।

डा. सिंहका अनुसार ती किशोरीलाई सुरुमा वीरगञ्ज हेल्थ केयरमा उपचारका लागि लगिएको थियो । हेल्थ केयरले कोरोनाको आशंका गर्दै आरडीटी परीक्षण गर्दा एण्टीबडि पोजेटिभ देखिएपछि हिजो नारायणी कोरोना विषेश अस्पतालमा रेफर गरिएको थियो ।

डा. सिंहका अनुसार उनको हिजो नै पीसीआर परीक्षणका लागि नमुना संकलन गरिएको थियो । उनको आज बेलुका मृत्यु भएको र पीसीआर परीक्षणको रिपोर्ट पनि पोजेटिभ आएको हो ।

“उहाँलाई वीरगञ्ज हेल्थ केयरमा आरडीटी पोजेटिभ देखिएपछि हाम्रो अस्पतालमा हिजो बेलुका ९ बजे भर्ना गरिएको हो, हामीले हिजो नै स्वाब सङ्कलन गरी प्रयोगशालामा परीक्षणका लागि पठाएका थियौं,” डा. सिंहले भने, “उहाँको आज बेलुका मृत्यु भयो, भर्खरै पीसीआर परीक्षणको रिपोर्ट पनि पोजेटिभ आयो ।”

डा. सिंहका अनुसार ती किशोरी बाराको परवानीपुर गाउँपालिका-८ की हुन् । डा. सिंहका अनुसार बारा र पर्सामा स्थानीयस्तरमा कोरोना संक्रमण भेटिएको छ ।

ती किशोरीलाई झाडापखाला,छारे रोग जस्तै काप्ने समस्या देखिएपछि उपचारका लागि अस्पताल भर्ना गरिएको थियो ।

स्वास्थ्य मन्त्रालयले भने उनको कोरोनाका कारण मृत्यु भएको पुष्टि गर्न बाँकी छ ।

अस्पतालले उनको कोरोनाले मृत्यु भएको पुष्टि गरेसँगै नेपालमा कोरोनाका कारण ज्यान गुमाउनेको संख्या ४५ पुगेको छ ।

शुक्रबार मात्रै थप एक जना ८५ वर्षीय महिलाको कोरोनाले मृत्यु भएको स्वास्थ्य मन्त्रालयले पुष्टि गरेसँगै ज्यान गुमाउनेको संख्या ४४ पुगेको थियो ।

Published On:
loading...

तपाईको प्रतिक्रिया

सम्बन्धित समाचार