काठमाण्डौ । चेक गणतन्त्र भ्रमणका क्रममा ताइवानकी ह्सियाओ बी खिममाथि चिनियाँ दूतावासका कर्मचारीले “आक्रमण” गरेको आरोपबारे चीनले कडा अस्वीकार गरेको छ।
स्टेट काउन्सिलको ताइवान मामिला कार्यालयका प्रवक्ता चेन बिन्ह्वाले बुधबार चिनियाँ मिडिया ग्लोबल टाइम्ससँग कुरा गर्दै भने, “हामीले सधैं चीनसँग कूटनीतिक सम्बन्ध भएका देशहरू र ताइवान क्षेत्रबीच कुनै पनि आधिकारिक आदानप्रदानको स्पष्ट विरोध गर्दै आएका छौं। साथै, ‘ताइवान स्वतन्त्रता’ अलगाववादीहरूलाई राजनीतिक मञ्च उपलब्ध गराएकोमा सम्बन्धित देशहरूमाथि कडा विरोध गर्छौं।”
चेनका अनुसार, सम्बन्धित देशहरूले एक-चीन सिद्धान्तको पालना गर्नुपर्छ र ‘ताइवान स्वतन्त्रता’ अलगाववादी शक्तिहरूद्वारा उक्साइएर वा उपयोग गरिनु हुँदैन। उनले भने, “चिनियाँ कूटनीतिज्ञहरूले सधैं आयोजक देशका कानुन र नियमहरूको पालना गरेका छन्।”
डीपीपी प्रशासनले उछालेको तथाकथित “आक्रमण” घटना मनगढन्ते भएको उल्लेख गर्दै चेनले भने, “उनीहरूले सही–गलतलाई उल्ट्याउने प्रयास गरेका छन् र यसरी ताइवान स्ट्रेटका दुवै पक्षबीच शत्रुतापूर्ण टकराव भड्काउन चाहेका छन्।”
चेनले डीपीपी प्रशासनलाई चेतावनी दिंदै थपे, “उनीहरूले जतिसुकै पटक आफ्ना झूटहरू दोहोर्याए पनि ती सत्य हुँदैनन्, र निरन्तरको यो नौटंकीले अन्ततः उनीहरूलाई मात्र लज्जित बनाउनेछ।”
