कपिलवस्तु । श्रीलङ्काका पूर्व राष्ट्रपति गोटावाया राजापाक्षेले प्राचीन तिलौराकोटको भ्रमण गरेका छन् । तिलौराकोट राजा शुद्धधनको राजदरबार एवम् बुद्धले आफ्नो जीवनको २९ वर्ष बिताएको ठाउँ हो । लुम्बिनी हुँदै प्राचीन कपिलवस्तुमा पुगेका राजापाक्षले बुद्ध स्थल तिलौराकोट, कुदान र निग्लिहवाको बारेमा जानकारी लिदैं भ्रमण गरेका हुन् ।
राजापाक्षेसँगै श्रीलङ्काका लागि नेपाली राजदूत सुदर्शन पाथिराना समेत सहभागी थिए । श्रीलंकनहरु प्राचीन कपिलवस्तुका साथै बुद्ध जन्म स्थल लुम्बिनी निकै श्रद्धाका साथ आउने भएकाले पूर्व राष्ट्रपतिले महत्वका साथ तिलौराकोट लगायतका क्षेत्रको भ्रमण गरेको लुम्बिनी विकास कोषका वरिष्ठ पुरातत्त्वविद् हिमाल उप्रेतीले बताए ।
पूर्व राष्ट्रपतिले तिलौराकोटको मुख्य दरबार, समयमाई मन्दिर, पश्चिमी र पूर्वीद्वार क्षेत्रको स्थलगत अवलोकन गरे । उनले भ्रमणको क्रममा तिलौराकोट दरबार अत्यन्तै सुन्दर ढङ्गले संरक्षण गरिनुका साथै यस स्थलमा सम्पूर्ण विश्वभरका आगन्तुकहरूले विश्व शान्ति समृद्धिका लागि पूजा र प्रार्थना गर्न यस स्थलको निरन्तर भ्रमण गर्ने विश्वास व्यक्त गरेका छन् ।
आफू यस पवित्र स्थलमा भ्रमण गर्दा अत्यन्तै गौरवान्वित भएको र आगामी दिनमा यस स्थलको पुनः भ्रमण गर्ने विचार व्यक्त गरेका थिए । तिलौराकोट क्षेत्रको संरक्षण र विकासका लागि राजदूत पाथिरानाले श्रीलङ्का सरकारले नेपाल सरकारसँग हातेमालो गरी कार्यहरू गर्ने प्रतिबद्धता समेत व्यक्त गरे ।
